Spread the love

NUKU’ALOFA,TONGA- MA’ASI 02,2021: 2:00PM(MEIDECC):  Hili ‘a e fakataha ‘a e Kōmiti ki he Ngaahi Me’a Fakatu’upaké (NEMC) pea mo e Komiti ki hono Tokangaekina ‘o e Covid-19, ‘i he pongipongi ‘o e ‘aho ni, kuo mahino ‘e toloi ‘a e vakapuna ko ia na’e ‘amanaki ke tu’uta mai ‘i he Pulelulu ‘o e uike ni, 03 Ma’asi mei Nu’usila.

Ko e tu’utu’uni ko ení ne fakatefito ia ‘i he tu’unga ‘oku ‘i ai ‘a e fakataputapui ‘a Nu’usila ki he Covid-19, ‘a ia na’e kamata ‘i he hengihengi ‘aneafí ‘a e fakataputapui (lockdown) levolo 3. Koe’uhí ke fakapapau’i ‘a e malu mo e hao ‘a e fonuá ‘oku toloi ai ‘a e vaka ni ‘o tali fanongonongo kae ‘oleva ke mahino ‘a e tu’unga ‘oku ‘i ai ‘a e Covid-19 ‘i ‘Okalani, Nu’usila.

Ko e vaka ‘e tolu na’e ‘amanaki ke tu’uta mai ‘i he ‘aho Pulelulu ‘o e uike ni ‘a ia ko e vaka mei ‘Aositelēlia, Nu’usila pea mo Fisi. ‘E kei tu’uta mai pē ‘a e vakapuna ia mei Fisi mo ‘Aositelēliá ko e vakapuná pe mei Nu’usila ‘oku toloi.

Taimi tatau pe kuo ‘osi fakapapau’i mei he Kapineti ke ngāue’aki ‘a e ‘aho ‘e 21 ki hono fakamavahe’i makehe (quarantine) ‘a e kau folau mai mei he ngaahi fonua muli.

Tuku atu mei he: Potungaue Fakamatala ‘Ea, Ma’u’anga Ivi, Ma’u’anga Fakamatala, Tokangaekina Ngaahi Fakatamaki, ‘Atakai, Feliuliuaki ‘o e ‘Ea mo e Fetu’utaki.

Leave a Reply

Your email address will not be published. Required fields are marked *