Spread the love
NUKU’ALOFA TONGA- MA’ASI 03,2021: 10:42AM(Nuku’alofa Times): Na’e tuku mai ‘i he ‘aho 24 ‘o Fepueli ha fakamatala mei he Potungaue MEIDECC ‘o pehe ‘oku fakafuofua ki he toko 247 ‘a e tokolahi ‘o e kau pasese mei he ngaahi Fonua kehelehe ‘e tolu ‘e tu’uta mai ki Tonga ni ‘i he ‘aho 3 ‘o Ma’asi ‘a ia koe ‘aho ni ia.

Koe ngaahi vakapuna, ‘oku ‘amanaki ke tu’uta mai ia mei ‘Okalani Nu’usila, Brisbane ‘Aositelelia pea mo Nadi, Fisi foki.

Fakatatau ki he fakamatala ‘a e Pule Lahi ‘a e Potungāue MEIDECC, Paula Pouvalu Ma’u, kuo ‘osi ngāue ‘a e kōmití ke vahevahe ‘a e tokolahi ‘o e kau pāsese te nau omi ‘i he ‘aho ni ke fakapapau’i ‘e ‘i he fika ofi ki he 250.

“Ko e tokolahi ‘a e kau pāsese mei Fisí kuo ‘osi fakapapau’i he taimi ni ko e toko 80, 101 mei Nu’usila pea mo e toko 66 mei ‘Aositelēlia ‘a ia ko e toko 247 ia tuku kehe kapau ‘e toe ‘i ai ha liliu.”

Ko e vaka koia mei Fisi, ‘oku ha’u ai ‘a e kau Tonga koia na’a nau ‘i ‘Initia, kau ngāue vaka ‘a e Friendly Island Shipping Agency (FISA) ko e kau ngāue fakafaifekau ‘a e Siasi ‘o Sisu Kalaisi ‘o e Kau Ma’oni’oni ‘i he Ngaahi ‘aho ki mui ni pea mo e kau ako. Ko e kau pāsese ko ‘eni kuo nau ‘osi ‘atā mei he kolonitini ‘i Fisi ko e talitali pe ki he vaka.

Ko e tokolahi ‘o kinautolu kuo ’osi fakafoki mai ki Tongá ni talu mei Siulai ‘o e ta’u kuo ’osí ko e toko 1, 731.

‘I he’ene a’u mai ki he lolotonga ni, ko e tokolahi ‘o kinautolu kuo nau lēsisita mai ‘i he uepisaití ‘a e pule’anga ke nau foki mai ki Tongá ni ko e toko 2, 795.

Kae kehe foki ‘i he ‘aneafi na’e toe tuku mai ha fakamatala ‘oku toloi e vaka mei ‘Okalani Nu’usila na’e ‘amanaki ke tu’uta mai ki Tonga ni, makatu’unga ‘eni ‘i he toe hiki hake ‘a e levolo fakataputapui ‘a Nu’usila kihe levolo 3.

Ko e kolonitini ‘o e kau pāsese kuo ‘osi hiki ‘o ‘aho ‘e 21(uike ‘e 3) ‘a ia na’e kamata ia mei he vakapuná ko ‘eni na’e  tū’uta mai ‘i he mahina kuo ‘osi.

Leave a Reply

Your email address will not be published. Required fields are marked *