Spread the love

NUKU’ALOFA- ‘EPELELI 09,2021: 9.10AM(Nukualofa Times): Na’e tuku mai ha fakamatala mei he Potungaue MEIDECC ‘i he 07 ‘Epeleli, 2021 ‘o pehe  ‘oku fakafuofua ki he vakapuná ‘e 4 ‘e tu’uta ‘i he ‘aho 28 – 30 ‘o e mahina ni.

‘I he polokalama fakafokifoki mai ko ia hotau kakai na’e tukuvakā ‘i muli talu mei he tāpuni hotau kau’āfonua ‘i Ma’asi ‘o e ta’u kuo’osi. Ko e ngaahi vakapuna ‘oku ‘amanaki le tu’uta mai ia  mei Nu’usila, Brisbane,Pangopango, Ha’amoa ‘Amelika pea mo Fisi foki.

Ko hono fakahā ‘eni ‘i he Fakataha’anga Fakafonua ki he Ngaahi Me’a Fakatu’upakē (NEMC) pea mo e Kōmiti ki hono Tokangaekina ‘o e Covid-19 ‘i he pongipongi Pulelulu ‘oe uike ni pe. Ko e vakapuna mei Nu’usila mo Brisbane ko e vaka angamaheni pē ia ‘i he polokalama ko ‘eni.

Fakatatau ki he Pule Lahi ‘a e Potungāue MEIDECC Paula Pouvalu Ma’u, ko e vaka ko ia mei Pangopangó ‘e ha’u ai mo e kau Tonga mei Pangopango, pea ‘e fakafoki foki ai mo e kau pāsese ‘oku fakafuofua ki he toko 20 mei Tonga ni ki Pangopango.

Na’e fakahā foki ‘e Paula, ko e hokohoko ‘o e ha’u ‘o e ngaahi vakapuná ‘oku faka’aho ‘e 28. ‘A ia ‘oku palani ke hili ‘a e vakapuna ‘i he ‘aho 28 ‘o e mahina ni, pea vakapuná hoko ‘i Mē ‘aho 26 pea mo Sune ‘aho 23.

“‘Oku makatu’unga pē ‘eni ke ‘oange ha taimi fe’unga ‘i he hili ‘a e ‘aho ‘e 21 ‘o e kolonitiní, ki he kau ngāue laine mu’á ke nau malōlō ai pea mo fakamā’opo’opo ‘o e ngaahi feitu’u ki he fakamavahe’i makehe (quarantine facilities).”

‘Oku ‘i ai foki mo e vakapuna mei ‘Aositelēlia ‘e tū’uta  ‘i Tonga ni, ‘o ‘ave ‘a e kau toli fua’i ’akaú makehe mei heni koe vaka ko ‘eni ‘oku ‘ikai ke ha’u ‘a mo ha kau pāsese.

Leave a Reply

Your email address will not be published. Required fields are marked *