Spread the love

Fa’u e MELESEINI TUFUI

Nuku’alofa – Me 25, 2021: 6.50pm (Nuku’alofa Times): Kuo tā e sipinga ‘e Ha’a Moheofo.

‘Oku totonu mo taau leva ke muimui ki ai ‘a e Tonga kotoa ‘o huhu malu’i mei he mahaki fakalilifu ko e KOVITI-19.

Ko e taumu’á, ke malu’i koe mo au he ‘oku lelei ki he fonua, ‘i he lolotonga ni mo e kaha’u foki.

Pea neongo ‘a e ngaahi fakafe’atungia ki he huhu malu’i, ka ‘oku ‘ikai tuka ai ‘a e vilitaki ‘a e Fale ‘o Tupou, Pule’anga mo e Potungaue Mo’ui ke fakamahino ‘oku mahu’inga, hao pea malu ‘a e faito’o Astra-Zeneca, pea ‘oku totonu ke ‘oua na’a fai ha ilifia.

‘I he ‘aho Tokonaki, 15 ‘o Me, 2021, na’e fakakoloa ‘a e polokalama ni ‘e he ‘Ena ‘Afifio, Kingi Tupou VI mo Kuini Nanasipau’u, ‘i he falemahaki Vaiola.  Ko e Ta’ahine ko Pilinisesi Salote Mafile’o Pilolevu Tuita na’a ne fuofua tali ‘a e huhu malu’i ni mo ne fakaola foki.

Na’e fuofua tu’uta mai ‘a e fo’i faito’o Astra-Zeneca ‘e 24,000 ke malu’i’aki e kakai ‘o e fonua ni.  ‘I he a’u mai ki he ‘aho Monite ‘o e uike ni, 17 ‘o Me, 2021, kuo laka hake he toko 20,000 ‘a kinautolu kuo huhu.  ‘I he tokolahi ni, ‘oku lakahake he toko 1,000 ko e kakai muli.

Ko e fifili leva, ko e ha fa’ahinga faka’ilonga ‘o ha uesia nai – pe ‘ikai – ‘a e faito’o ni ki he kakai?  Ko e hā ha fakamo’oni mei he kakai kuo nau tali ke huhu malu’i kinautolu?

Fakatatau ki he ngaahi fakamatala kuo fai ki he Potungaue Mo’ui, kuo ‘i ai ha fanga ki’i uesia ma’ama’a pe – ‘o fakafuofua ki he tesimale ‘e 4 ‘o e peseti (0.4%) ‘o e toko 20,000 tupu kuo ‘osi huhu. ‘Oku kau ai ‘a e mofimofi mo e mamahi’ia ‘a e sino pea mo e langa ‘ulu foki.  Ko e fale’í, kenau talatala pe ki Vaiola, folo ha fo’i panatolo mo malōlō lelei.

Ko e kakai tu’u lavea ngofua ki he mahaki ni ko e kau toulekeleka pea mo e kakai ‘oku mo’ua he ngaahi mahaki ‘oku ‘ikai pipihi ‘o hange ko e suka, toto ma’olunga pea kau ai mo e fokoutua ‘o e halanga manava ‘o hange ko e hela. Fakatatau ki he fale’i ‘a e Potungaue Mo’ui, ko e kakai ni kuo ‘ikai malohi honau ivi malu’i (immunity compromised).

Ka ‘oku ‘i ai nai ha fakatu’amelie ki he huhu malu’i?

‘I he fakamatala ‘a e Pule Lahi Le’ole’o ‘o e Potungaue Mo’ui, Dr. Reynold ‘Ofanoa, kapau ‘e lelei ‘etau tu’unga huhu malu’i, he’ikai ke fu’u lahi ha kakai ‘e fiema’u ke fakatokoto koe’uhi he’ikai ke fu’u uesia fēfē kinautolu ‘e he COVID-19, ‘a e kakai kuo nau ‘osi huhu.

“Ko e huhu malu’i ko e founga kuo tā tu’olahi hono fakamo’oni ‘oku malava ke ne fakasi’isi’i ‘a e mafola e mahaki pea kapau pe ‘e toki faingamalie ke mafola, ‘e ‘ikai ke fu’u uesia kovi ‘a e mahaki ki he mo’ui ‘a e kakai tu’u lavea ngofua, pea pehē foki ki he kakai kehe pe kapau kuo ‘osi fai honau huhu malu’i.”

Na’e fakatātā ‘aki e Dr. ‘Ofanoa ‘a e longa’ifanau ‘e toko 90 na’e mate mei he misele ‘i Ha’amoa, ‘a ia ko e misele ‘oku fakatupu ‘e he kalasi vailasi ‘e taha.   Kā ‘i Tonga ni, na’e ‘ikai ‘i ai ha mate he misele koe’uhi ko e tu’unga ma’olunga ne a’u ki ai e huhu malu’i e fanau ki he mahaki misele ‘o a’u ki he 98% kuo huhu malu’i.

“’I he’ene pehē leva, kapau ‘e faifaiange kuo hoko mai ‘a e mahaki KOVITI-19 ki Tonga ni, ko kinautolu ‘e tu’u lavea ngofua ki ai, ‘e uesia tamaki kinautolu ‘e he mahaki ni ‘o kau ai e nounou ‘aupito e manava, mofi lahi, felangaaki pea a’u pe ki he mate ‘o hangē ‘oku tau mamata ki ai he ngaahi fonua ‘i tu’apule’anga ‘o kau ai ‘a ‘Initia,” ko e fakamatala ia ‘a Dr.’Ofanoa.

‘Oku hangē nai ha feingatau ki he Potungaue Mo’ui ‘a e feinga ke fakamahino lelei ki he kakai e mahu’inga kenau huhu malu’i neongo e ngaahi pole ki he me’angaue ‘oku fiema’u, ‘o hange ko e fakamatala ‘a e Tokoni Pule ki he Va’a ki Tu’a ‘o e Huhu Malu’i ko Sister Taufa Mone.

“‘Oku fai pe feinga ki he kakai … … mo feinga ke fakalotoa mo ‘ave ‘a e ngaahi lelei ‘o e huhu malu’i kiate kinautolu na’a faifaiange kuo nau tali.

“Ko e tu’u he taimi ni, ka tō mai e Koviti ‘e pau ke uesia e halanga manava pea ‘oku fiema’u ia ke toe lahi ange fanga ki’i misini ‘oku fakamanava ‘aki ‘a e kakai he taimi ‘oku nau puke ai.  Manatu’i ‘e faingata’a’ia ‘enau manava pea ‘e nounou. ‘Oku mahino ‘oku fu’u si’isi’i ‘aupito misini fakamanava kasa ‘I Tonga ni,” ko e fakamatala ia ‘a Sr. Mone.

Kuo ‘osi huhu malu’i foki ‘a Soane Puā ‘o Fasi moe Afi.

“Ko e kakai ‘oku nau tu’uaki mai ‘a e huhu malu’i ko e kakai falala’anga pea ko honau fatongia ke fakamo’ui e kakai.

“Ko e ‘uhinga na’a ku ‘alu ai ‘o huhu ko ’eku toka’i ‘a e ngaue ‘oku fai ‘e he Potungaue Mo’ui pea mo e kakai ‘oku ou mo’ui fakataha mo ia. Ko e fakalotolahi atu pe kia kimoutolu kemou ‘alu ‘o huhu malu’i pea ke tau mo’ui mateuteu ma’u pe he ko e mahaki ko’eni, ko e fehu’í pē pe ko e mate pe ko e mo’ui,” ko e fakalotolahi ia ‘a Soane Puā.

Leave a Reply

Your email address will not be published. Required fields are marked *