Spread the love

Fa’u ‘e ‘AMELIA MO’UNGA

Nuku’alofa – Me 25, 2021: 6.40pm (Nuku’alofa Times): Neongo ‘a e ngaahi fakatanga ki he huhu malu’i, ka ‘oku ‘ikai tuka ai ‘a hono fai poupoua ‘e he kakai.  Kuo lakahake he toko 20,000 kuo ‘osi huhu malu’i mei he KOVITI-19.

Kuo kauvaha atu eni ‘a e huhu malu’i mei Tongatapu ni ki ‘Eua mo e ngaahi motu ‘o Tokelau.  Talu e kamata ‘a e teke ki he huhu malu’i ‘e he Potungaue Mo’ui, mo e mahino ‘a e vekeveke ‘a e kakai tokolahi ke malu’i kinautolu mo honau famili.

Kuo holo eni ‘o kamata mei he ta’u 30 ‘a e kakai tenau lava ‘o huhu.  Ko e fo’i faito’o ‘e 24,000 na’e fuofua kamata’aki ‘a e huhu malu’i.  ‘E ngata ‘a honau ‘aonga ki he ‘aho 31 ‘o Me.  Ka ko e fehu’i?  Kuo ke kau nai he lau ki he tokolahi ko eni?

Fakatatau ki he fakamatala ‘a Dr. ‘Ofa Tukia mei he Va’a Ngaue ki Tu’a ‘a e Potungaue Mo’ui mo e Huhu Malu’i, ‘e malava ke matatali ‘e he sino ‘o kinautolu kuo huhu malu’i ‘a e mahaki KOVITI-19 ‘o ka a’umai ki Tonga ni.  Na’a ne tali ‘a e ngaahi fehu’i mei he polokalama Felafoafi ‘i he Letio Tonga ‘i he ‘aho Falaite, 21 ‘o Mē, mo fakamamafa’i e mahu’inga ‘o e huhu malu’i.

Ka ko e ha nai ha fa’ahinga uesia ‘o kapau ‘e ‘ikai teke huhu malu’i?  Ko e ha ha ‘uhinga ‘oku ‘ikai keke fie malu’i ai koe mo Tonga ni?

Ka a’umai ‘a e mahaki faka’auha ni pea ka ma’u ha taha na’e te’eki ke huhu, ‘e malava kene fakapipihi atu e mahaki ki hono famili, kaungame’a pea mo ha kakai tokolahi.  He ‘ikai kene lava ke matu’uaki ‘a e mahaki ni pea ‘e a’u ki ha tu’unga kuo ne fu’u faingata’a’ia pea iku ‘o fakamanava kasa.  Ko e iku’angá – ko e mate pe, ‘o fakatatau ki he fakamatala ‘a Dr. ‘Ofa Tukia.

Kuo takimu’a ‘a Faifekau Barry Taukolo ‘o e taha ‘o e ngaahi feohi’anga fakalotu ‘i Tonga ni, ‘oku ne fakafepaki’i e huhu malu’i.  ‘Oku ne tui ‘oku fu’u vave ‘a hono ngaue’aki ‘a e faito’o Astra-Zeneca ‘a ia ‘oku fai ‘aki e huhu malu’i ‘i Tonga ni.

“Oku ou tui au ia ‘oku ‘osi hanga ‘e he ‘Otua ‘o ngaohi hotau sino kene lava ‘o matu’uaki e ngaahi vailasi mo e pekitilia ‘oku ha’u ke fakafepaki’i hotau sino, ‘osi fakanatula pe hono hanga ‘e he ‘Otua ‘o fa’u kitautolu he ko e temipale foki eni e laumalie ‘ia tautolu.  ‘I he Tohi Saame 139:14-18 ‘oku fakailifia pea fakamanavahē hono ngaohi ‘e he ‘Otua hotau sino, ko e ‘uluaki ‘uhinga ia ‘i he ‘eku tui fakalotu,” ko e fakamatala ia ‘a Faifekau Taukolo.

Kaekehe, na’a ne toe pehē ‘e malava ke liliu ‘a ‘ene tui ki he huhú ‘o kapau ‘e fakapapau’i ‘oku hao mo malu.  Kā ‘i he lolotonga ni, ‘oku ne kei fakafepaki pe ki he huhu malu’i.

Lolotonga eni, na’e pehē ‘e Sister Taufa Mone, Tokoni Pule ki he Va’a Huhu ‘i he tafa’aki Ngaue ki Tu’a ‘a e Potungaue Mo’ui, neongo ‘a e ngaahi fakamatala fakafepaki mo fakaangá “ka ‘oku kei fai pe feinga ke fakalotoa mo ‘ave ngaahi lelei ‘o e huhu malu’i na’a faifaiange kuo nau tali.”

‘I he fekau’aki mo e kakai toulekeleka, na’e pehē ‘e Sister Mone “ko kinautolu ia ‘e uesia lahi taha pea ‘e lahi e mate ko e ‘uhinga ko e ’ikai kenau huhu malu’i, pea tahá ‘oku mou ‘ilo pe foki koe huhu malu’i ‘e tokoni ia ke langa hake ‘a e ivi malava ke taliteke’i ha mahaki pe immune ko eni hotau sino.  Ko e ‘uhingá ‘e lava pe ‘o malu’i ‘o ka ma’u kita ‘e he mahaki ‘e tō ma’ama’a pe.”

Na’e kau atu ‘a Takimaama Tau’ataina ‘o Nukunuku ‘o huhu malu’i, ‘i he taumu’a ke malu’i ia pea malu’i mo e kakai kehe.

“’Oku ou fiefia ‘aupito ke u kau ‘i he huhu malu’i koe’uhi ko e ngaue’anga ’oku ou ‘i ai ‘oku lahi ‘eku feohi holo mo e kakai.  Ko e ‘uhinga ia ‘eku huhu ko e poupou ki he mou’i lelei pea mo e hao mo malu hoku famili mei he vailasi ko ‘eni.”

‘Oku ngaue ‘a Takimaama ko e Pisope ‘o e Uooti Nukunuku ‘o e Siasi ‘o Sisu Kalaisi ‘o e kau Ma’oni’oni ‘o e Ngaahi ‘Aho Kimui ni.

“Oku ou fie fakalotolahi ai pe kia kinautolu ‘i hoku fungavaka ‘a e mahu’inga koia ke nau poupou ki he huhu malu’i telia ha ngaahi nunu’a ‘a mui ai.”

‘I he toko 20,000 tupu kuo ‘osi huhu malu’i, kuo lakahake he toko 1,000 ai ko e kakai muli.

Kuo huhu malu’i ‘a e Fale ‘o Ha’a Moheofo, hou’eiki e fonua mo e kakai tokolahi.  Kuo hounga ai ki he Potungaue ‘a e ngaahi poupou mo e tokoni kuo fai ange ‘i he vilitaki ki he mo’ui lelei pea mo e hao mei he KOVITI-19.

Kā ko e fehu’í?  Me’a ní he ‘ikai pe teke fie kau mai ko e ki he pue ki he mo’ui lelei – ka ke loto pe keke uesia mo tamate’i ha ni’ihi kehe ‘oka a’umai ‘a e KOVITI-19?

Leave a Reply

Your email address will not be published. Required fields are marked *